Þriðjudagur

Áhugaverður fundur sem kornbændur stóðu fyrir í dag.  Ég fræddist heilmikið um möguleika á frekari kornrækt og hagnýtingu þess bæði fyrir menn og skepnur. 

Mánudagur

Á föstudaginn fundaði ég ásamt Björgu í Menningarmiðstöðinni og Ara Þorsteinssyni með framkvæmdastjóra Hönnunarmiðstöðvar og förstöðumanni hönnunardeildar Listaháskóla Íslands.  Í framhaldi ræddum við þrjú um áframhald á Hafnarvík-Heppu verkefninu.  Fundaði síðdegis í Landsbanka Íslands.

Í dag fórum við framkvæmdastjórar yfir hugmyndir um sameiningu sveitarfélaga og ræddum starfsmannamál. 

Eftir hádegi funduðum við Jóhann Morávek og Stefán Ólafsson um rekstur og húsnæði tónskólans og ákváðum að leggja grunn að stefnumótun fyrir framtíð skólans.  Talandi um tónlist að þá hitti ég Júlíus Sigfússon tónlistarmann sem ásamt félögum sínum æfir í aðstöðunni sem útbúinn var í kjallara vöruhússins gamla.  Hann var ánægður með aðstöðuna.

Síðdegis fór ég yfir nokkur mál með Reyni Arnarsyni og Árna Þorvaldssyni.  Við hittumst reglulega til að fara yfir verkefni líðandi stundar og spá í þjóðmálin og hvernig þau geta haft áhrif á okkur hér á Hornafirði.

Klukkan 20 í kvöld var opin fundur í Mánagarði um verndaráætlun fyrir Vatnajökulsþjóðgarð.  Drög voru send á hagsmunaaðila fyrir skömmum og fundur verður í Hofgarði á miðvikudaginn.  Að þessu ferli loknu verður farið yfir drögin af hálfu svæðisráðs þjóðgarðsins sem vísar þeim síðan til stjórnar.  Yfirgripsmikil og vönduð vinna hjá ráðgjöfum og starfsmönnum garðsins.

Fimmtudagur

Skýrsla um rekstur og afkomu hafna á Íslandi var birt í byrjun vikunnar.  Þar kemur fram hversu reksturinn er erfiður víða og skuldir háar.  Breytt löggjöf um hafnir auka enn frekar á vanda þeirra því með henni var öllum styrkjum ríkisins í framkvæmdir hætt.   Ofan á þetta bætist að dregið hefur verulega úr sjóflutningum.  Árið 2006 skiluðu einungis 9 hafnir rekstrarafgangi en hinar 36 voru reknar með tapi upp á 1,5 miljarð króna samtals.  Í árslok 2008 námu skuldir hafna alls 14,1 miljarði.  Nefndin, sem skipuð var af samgönguráðhera, leggur til að eftirlitsnefnd með fjármálum sveitarfélaga verði falið að hafa sérstakt eftirlit með rekstri hafna og hún fái vald til að breyta gjaldskrá þeirra þannig að hafnir verði rekstrarhæfari.  Í töflu í viðauka með skýrslunni kemur fram að frá árinu 1990 til 2008 hafa rekstrartekjur hafnarsjóðs Hornafjarðar aukist um 60,1% þegar tekið hefur verið tillit til verðlagshækkanna.  Hækkunin á sér fyrst og fremst stað frá árunum 2000 - 2008 þegar rekstrartekjur hækka úr 75,9 miljónum í 119,4 miljónir.  Að sama skapi hefur afkoman batnað og síðustu ár hefur höfnin alltaf skilað afgangi af rekstri.

Sjávarútvegur er mikilvægur hér og hafnarsjóður verður að halda áfram að byggja upp aðstöðum. Í ár verður Bræðslubryggja löguð, gengið frá umhverfi Álaugareyjarbryggju og malbikað á hafnarsvæðinu. 

 

 

Miðvikudagur

Var á fundi með UMFÍ í morgun um hugmynd sem unnið hefur verið um nokkurt skeið.  Ákveðið að taka saman greinargerð og leggja fyrir menntamálaráðuneytið.  Síðdegis fundaði ég í samgöngu- og sveitastjórnaráðuneytinu um sameiningu sveitarfélaga.  Á næstunni verður farið yfir málið í bæjarráði og bæjarstjórn og mikilvægt að vanda mjög umræðuna þannig að tekin verði stefna sem er að undangenginni yfirvegaðri skoðun á þeim kostum sem standa okkur til boða.

Þriðjudagur

Seinni partinn var spilað viðtal við mig á RÚV um niðurstöðu Vísbendingar um það sem kallað er "Draumasveitarfélagið".  Á mælikvarða Vísbendingar skorar Sveitarfélagið Hornafjörður hátt.  Mikilvægt er að átta sig á að slíkir mælikvarðar varpa engu heildstæðu ljósi á árangur af starfi sveitarfélaga.  Það er þó ljóst af úttekt Vísbendingar að fjárhagurinn er traustur og það rímar vel við þá vissu sem við höfðum um rekstur, efnahag og sjóðstreymi sveitarfélagsins.

Viðtöl við fjölmiðla eru sjaldan spiluð eða birt óklipt.  Þannig var svar mitt við þeirri spurningu fréttamannsins hvað skýri góða stöðu sveitarfélagsins klippt niður.  Því miður var sneytt af þar sem ég hrósaði forstöðumönnum og bæjarstjórn fyrir ábyrga meðferð fjármuna og taldi það eina af tveimur megin ástæðum fyrir árangrinum.  Hin er að atvinnuvegirnir standa nokkuð vel.

Mánudagur

Í síðustu viku fundaði heilbrigðis- og öldrunarráð með eldri borgurum.  Þau nefndu að vantaði upplýsingar um þjónustu við eldri borgara og ýmislegt sem varðar húsnæði í þjónusturými í Ekrunni.  Bæjarráð fundaði í dag og vísaði m.a. þriggja ára áætlun til bæjarstjórnar. 

Fyrsta loðnan barst að landi í gær.  Mikið gleðiefi að gefinn hafi verið út kvóti.  Loðnuveiðar hafa áhrif jákvæð áhrif á afkomu margra heimila, fyrirtækja og svo nýtur bæði hafnarsjóður og sveitarsjóður góðs af.

Föstudagur

Vann úr fundunum í gær og skoðaði betur stöðu sveitgarfélagsins í þeirri umræðu sem á sér stað um sameiningar. Undibjó samantekt um málið til að koma umræðu af stað.

Fundaði með Guðrún Júlíu á HSSA um þjónustu við eldri borgara, OLE II verkefnið og um starfsemi HSSA.

Í hádeginu hlýddi ég á fyrirlestur Þorbjargar Arnórsdóttur um landnám á Suðausturlandi, tilvist Papa og ættartré Rögnvalds Mærajarls sem var faðir Hrollaugs landnámsmanns og ættfaðir margra höfðingja í Evrópu og sagnaritara á Íslandi.  Óskandi er að hægt sé að halda áfram rannsóknum á þessari sögu.

Við Rósa í Ríki Vatnajökuls funduðum með fulltrúum Djúpavogshrepps um skemmtiferðarskip og hvernig við höldum áfram samstarfi á milli sveitarfélaganna um að laða fleiri skip á svæðið.  Mér finnst mikilvægt að við beinum farþegum á þessum skipum í afþreyingu á svæðinu sem getur annað meiri eftirspurn og komið handverki sem framleitt er á svæðinu á framfæri.

 

Landnotkun og sameining sveitarfélaga

Mengaður jarðvegur í Evrópu og Suðaustur-Asíu, aukin eftirspurn eftir matvælum og aukin velmegun í heiminum eru stórar áskoranir sem blasa við landbúnaði í heiminum.  Því er mikilvægt að Ísland hugi vel að stöðu sinni í þessari framtíðarsýn.  Við eigum talsvert eftir af ónotoðu ræktunarlandi og megun ekki kasta því á glæ fyrir stundarhagsmuni.  Um þetta fræddumst og annað er varðar landnotkun á ráðstefnu sem haldin var af Fræðasetri Háskóla Íslands á Suðurlandi í dag.

Seinni partinn var kynning á átaki um sameiningu sveitarfélaga.  Markmið er að efla sveitarfélögin með flutningi verkefna, s.s. málefni fatlaðra, aldraðra og jafnvel framhaldsskóla og heilsugæslu.  Sameining er talinn forsenda þess að hægt sé að ráðast í þennan mikla verkefnaflutning.  Í hugmynd nefndar sem vinnur að breytingu á skipan sveitarfélaga er Sveitarfélagið Hornafjörður óbreytt og er þá helst vísað til landfræðilegrar sérstöðu okkar en líka að vel hefur tekist til við rekstur sveitarfélagsins og þeirra málaflokka sem rætt er um að flytja.

Umræður um þetta stóra mál þarf að eiga sér stað hér í sveitarfélaginu þannig að fulltrúar þess á landsþingi sveitarfélaga næsta haust geti haldið uppi málflutningi sem góð samstaða er um á heimaslóð.

Orkubóndinn

Nýsköpunarmiðstöð Íslands stóð fyrir námskeiði í dag sem ber heitið Viltu gerast orkubóndi?  Það var góð mæting, fullur salur af fólki á öllum aldri og víðsvegar að úr samfélaginu.  Fyrirlestrarnir voru líka yfirgripsmiklir og áhugaverðir. Fyrst var rætt almennt um orkumál og skyggnst inn í framtíðina.  Þróun þarf að eiga sér stað til að taka við af olíu og öðrum endanlegum orkugjöfum ef ekki eigi að skapast skortur á orku.  Af fyrirlestrum að dæma eru ennþá mjög margt vannýtt og vanþróað.  Til dæmis var áhugavert að heyra hvernig menn sjá fyrir sér að nýta osmósu til orkuöflunar. 

Í ráðhúsinu var lokið við að skrifa greinargerð um af hverju málefni fatlaðra eigi að heyra undir Sveitarfélagið Hornafjörð en ekki að falla undir stærra þjónustusvæði eins og það er kallað.  Ég tel að færð hafi verið góð rök fyrir því að það sé hvorki hagkvæmt né þeim sem nýta sér þjónustuna til hagsbóta að málaflokkurinn verði tekin af sveitarfélaginu.  Ég er líka bjartsýnn á að óskir okkar verði virtar enda hægt að sýna fram á öruggan og faglegan rekstur síðan að reynslusveitarfélagsverkefnið hófst í ársbyrjun 1997.

 

Mánudagur

Þorrablótið var stórfínt að vanda.  Skemmtiatriðin stóðu vel fyrir sínu og maturinn góður.  Salurinn fékk smá andlitslyftingu með tjöldum sem hengd voru umhverfis hann.  Á laugardaginn fundaði bæjarráð og að honum loknum fór ég á fótboltaæfingu sem fram fór á fjörunum við Stokksnes.  Myndir af æfingunni má sjá á nýrri heimasíðu meistaraflokks Sindra.  Æfingar eru nú komnar á fullan skrið og í kvöld var hart tekist á. 

Dagurinn hófst með fundi framkvæmdastjóra þar sem við fórum yfir verkefni sem við ákváðum að vinna að í lok ágúst. Margt af þeim er komið í höfn en annað sem við eigum eftir að klára.  Fórum einnig yfir starfsmannastefnuna og minntum hvort annað á sem eftir á að gera.

Fundur var í svæðisráði þjóðgarðsins kl. 16.00 og ekki laust við að hugurinn hafi verið með landsliðinu þar sem það háði frækilega baráttu við Króata.